नारायणी रङ्गशालामा वर्षाको बाधक: कर्णाली र लुम्बिनीबीचको प्रधानमन्त्री कप क्रिकेट बीचमै रोकियो

वीरगञ्ज-वीरगञ्जमा जारी प्रधानमन्त्री कप पुरुष राष्ट्रिय क्रिकेट प्रतियोगिता अन्तर्गत कर्णाली प्रदेश र लुम्बिनी प्रदेशबीचको प्रतिस्पर्धा वर्षाका कारण प्रभावित भएको छ। वीरगञ्जस्थित नारायणी रंगशालामा आज तय भएको उक्त खेल वर्षा सुरु भएपछि बीचमै रोक्नुपरेको हो।

खेलको सुरुवातमा लुम्बिनी प्रदेशले टस जितेर पहिले फिल्डिङ गर्ने निर्णय गर्दै कर्णाली प्रदेशलाई ब्याटिङको निम्तो दिएको थियो। कर्णालीले आफ्नो इनिङ्स सुरु गरेर ७ ओभरको खेल सकिँदा बिना कुनै विकेटको क्षति २० रन जोडेको थियो। सोही अवस्थामा वर्षा सुरु भएपछि खेल अगाडि बढ्न सकेन।

मैदानमा कर्णालीका ओपनर ब्याटरद्वय रवीन्द्र शाही र सुनिल धमला क्रिजमा थिए। खेल रोकिँदा शाहीले ९ रन र धमलाले ७ रन बनाएर खेलिरहेका थिए। वर्षा नरोकिएपछि दुवै टोलीका खेलाडी र समर्थकहरू खेल सुचारु हुने प्रतीक्षामा रहेका छन्। यसअघि पनि देशका विभिन्न स्थानमा भएको वर्षाले सडक तथा खेलकुदका गतिविधिहरूमा असर पुर्‍याइरहेको छ।