रास्वपाको संसदीय प्रशिक्षण: ‘भावी प्रधानमन्त्री’ बालेन शाह किन भएनन् सहभागी?

काठमाडौँ – राष्ट्रिय स्वतन्त्र पार्टी (रास्वपा) ले नवनिर्वाचित सांसदहरूका लागि आयोजना गरेको दुई दिने विशेष संसदीय अभिमुखीकरण कार्यक्रम आज बुधबार सकिँदैछ। मंगलबारदेखि काठमाडौँको एक होटलमा सुरु भएको यो आवासीय कार्यक्रममा सांसदहरूलाई संसदीय अभ्यास, सदनको मर्यादा र वर्तमान कानुनी व्यवस्थाबारे विस्तृत जानकारी दिइएको छ।

बालेन शाहको अनुपस्थिति र सरकारको गृहकार्य

अभिमुखीकरण कार्यक्रमको समापन सत्रमा पार्टी सभापति रवि लामिछाने सहभागी हुने भए पनि पार्टीका वरिष्ठ नेता बालेन्द्र शाह (बालेन) भने उपस्थित नहुने भएका छन्। आगामी सरकारको ‘भावी प्रधानमन्त्री’ का रूपमा अघि सारिएका शाहको अनुपस्थितिलाई राजनीतिक वृत्तमा चासोका साथ हेरिएको छ।

यद्यपि, पार्टी प्रवक्ता मनिष झाले शाहको अनुपस्थितिलाई स्वाभाविक रूपमा लिन आग्रह गरेका छन्। प्रवक्ता झाका अनुसार वरिष्ठ नेता शाह यतिबेला आगामी सरकार गठनको आन्तरिक गृहकार्य र मन्त्रालय बाँडफाँडको तयारीमा व्यस्त छन्। “उहाँ (बालेन शाह) आगामी सरकारको महत्त्वपूर्ण जिम्मेवारी र गृहकार्यमा हुनुहुन्छ। केही दिनमै उहाँ शारीरिक र मानसिक रूपमा निकै खट्नुपर्ने अवस्था छ, त्यसैले उहाँ यस कार्यक्रममा सहभागी नहुनुभएको हो। यसलाई अन्य अर्थमा बुझ्न जरुरी छैन,” झाले स्पष्ट पारे।

संसदीय अभ्यासमा जोड

रास्वपाले आफ्ना सांसदहरूलाई सदनमा प्रभावकारी भूमिका खेल्न र ऐन-कानुन निर्माणको प्रक्रियामा निपुण बनाउन यो कार्यक्रम आयोजना गरेको हो। कार्यक्रममा विभिन्न कानुनी विज्ञ र अनुभवी व्यक्तित्वहरूले सांसदहरूलाई प्रशिक्षण दिएका छन्। आजको समापन सत्रमा सभापति लामिछानेले सम्बोधन गर्ने र सांसदहरूलाई जनताको मुद्दा सदनमा बलियोसँग उठाउन निर्देशन दिने कार्यक्रम छ।

नयाँ सरकार गठनको रस्साकस्सी चलिरहेका बेला रास्वपाले आफ्ना सांसदहरूलाई सङ्गठित बनाउन र संसदीय प्रक्रियाबारे प्रशिक्षित गर्न यो कार्यक्रमलाई विशेष महत्त्व दिएको छ। वरिष्ठ नेता बालेन शाह सरकार निर्माणको ‘कोर टिम’ मा बसेर रणनीति बनाइरहेकाले उनले अभिमुखीकरण भन्दा कार्यकारी तयारीलाई प्राथमिकता दिएको बुझिएको छ।