विश्वकप क्रिकेटमा आज अमेरिका र आयरल्यान्डबीच भिडन्त हुँदै

काठमाडौं-आईसिसी टी–२० विश्वकप क्रिकेट अन्तर्गत शुक्रवार अमेरिका र आयरल्यान्डबीच खेलको भिडन्त हुँदैछ। अमेरिकाको सेन्टरल ब्रोवार्ड रिजनल पार्क स्टेडियममा हुने आजको खेल राति ८ः१५ बजेबाट सुरु हुनेछ।

मोनाङ्क पटेलको कप्तानीमा रहेको अमेरिकाले शुक्रवारको खेलमा जित निकाल्दै सुपर ८ मा पुग्न चाहन्छ भने आयरल्यान्ड पहिलो जितको खोजीमा रहने छ।

समूह ‘ए’ बाट भारत एक खेल अगावै सुपर ८ मा पुगिसकेको छ भने अमेरिका सुपर ८ मा पुग्ने बलियो दाबेदार मानिएको छ। हालसम्म ३ खेल खेलेको अमेरिकाले २ मा जित निकालेको छ भने एक खेलमा पराजि भएको छ। र, ४ अङ्क जोडेर समूहको दोस्रो स्थानमा रहेको छ।

आयरल्यान्ड भने समूहको पुछारमा रहेको छ।