कुलमानको गर्जन: ‘हामी जेनजी आन्दोलनको उपज हौँ, अब गरिबको अनुहारमा उज्यालो ल्याउँछौँ’

बुटवल –उज्यालो नेपाल पार्टीका अध्यक्ष एवं पूर्व ऊर्जामन्त्री कुलमान घिसिङले आफ्नो पार्टी देशकै सबैभन्दा नयाँ र ऊर्जाशील शक्ति भएको दाबी गरेका छन्। आइतबार रूपन्देहीको भैरहवामा आयोजित विशाल चुनावी सभालाई सम्बोधन गर्दै अध्यक्ष घिसिङले ‘जेनजी’ (Gen-Z) पुस्ताको आन्दोलन र भावनालाई सम्बोधन गर्नकै लागि उज्यालो नेपाल पार्टीको उदय भएको स्पष्ट पारे।

‘टेस्टेड’ दलबाट परिवर्तन असम्भव

वर्षौँदेखि सत्तामा रहेका पुराना दलहरूलाई ‘टेस्टेड’ शक्तिको संज्ञा दिँदै उनले अब उनीहरूबाट देश विकास सम्भव नभएको बताए। “पुराना पार्टीहरू नयाँ हुन सक्दैनन्, उनीहरूले आफ्नो अवसर गुमाइसकेका छन्,” घिसिङले भने, “अबको नेतृत्व युवा र भिजन भएकाहरूको हातमा हुनुपर्छ।” उनले आफूले नेपाल विद्युत् प्राधिकरणको नेतृत्व सम्हाल्दा देशलाई लोडसेडिङको अन्धकारबाट मुक्त गराएको स्मरण गर्दै अब राजनीति र समग्र राज्य प्रणालीको ‘लोडसेडिङ’ अन्त्य गर्ने पालो आएको बताए।

मिटरब्याजी र सहकारी पीडितको पक्षमा उभिने प्रतिबद्धता

आफ्नो पार्टीको मुख्य एजेन्डाबारे बोल्दै पूर्वमन्त्री घिसिङले देशमा व्याप्त मिटरब्याजी, लघुवित्त र सहकारी ठगीका कारण किसान तथा विपन्न वर्ग निकै मर्कामा परेको उल्लेख गरे। उनले यी समस्याहरूको दीर्घकालीन समाधानका लागि शक्तिशाली आयोग गठन गर्ने र दोषीहरूलाई कडा कानुनी दायरामा ल्याउने प्रतिबद्धता जनाए। “गरिब परिवारको अनुहारमा मुस्कान र उज्यालो ल्याउनु नै हाम्रो अन्तिम लक्ष्य हो,” उनले थपे।

भैरहवाको चुनावी सभामा उपस्थित समर्थकहरूलाई सम्बोधन गर्दै उनले उज्यालो नेपाल पार्टीले विकास र सुशासनको नयाँ मोडल प्रस्तुत गर्ने दाबी समेत गरे।